Se aínda non o tes agora podes descargar en pdf o documento Os incendios forestais en Galiza que recentemente foi presentado en Compostela premendo nesta ligazón.

 

A Comisión Moncho Reboiras 35 aniversario vén de colgar na rede un vídeo resumo da Homenaxe Popular que o pasado 7 de agosto organizou á memoria do comunista e patriota galego Xosé Ramón Reboiras Noia, asasinado en Ferrol pola policía española o 12 de agosto do ano 1975:

 

 

A FPG considera que a grave situación que outravolta vivimos a causa dos diversos incendios que devoran o noso territorio nacional está a desvelar o modus operandi dunha administración autonómica que utiliza o cerco mediático e a mentira como ferramentas políticas para soliviantar o posíbel impacto social que podería aparellar unha información veraz sobre a superficie de masa forestal queimada nos últimos días.

 

Moita xente descoñece, e outra moita intenta agochar, que a RAG nace oficialmente no 1906 na emigración cubana como expresión dun grupo de patriotas galegos que cren indispensábel a existencia dunha institución que sexa ferramenta da defensa da lingua galega e dos dereitos dos seus falantes.

 

A Academia Galega non foi polo tanto unha cesión competencial do estatuto de 1981, nin do de 1936, nin foi unha concesión monárquica expresada na constitución española de 1978. Foi a vontade dunha parte do pobo máis concienciado, quen sentiu a necesidade colectiva da súa creación.

 

Hai uns días celebramos, como vén facendo a Galiza rebelde desde hai noventa anos, un novo Día da Patria. Moito choveu desde que as Irmandades da Fala proclamaran o 25 de xullo como o noso día nacional e moitos foron eses días que tiveron de ser celebrados na clandestinidade. Aínda así, as nosas arelas de liberdade, o noso compromiso coa loita pola República Galega, lévanos a manter esta data, non coma un día de liturxia simbólica, baleiro de contido, senón coma unha xornada de celebración mais tamén de loita activa e renovada na que mostramos a nosa dignidade como galegas e galegos libres. Eis a Galiza rebelde que non claudica ante as continuas agresións que sofre por parte do Estado español e o seu apéndice autonómico.

 

Como vén facendo desde os inicios da iniciativa a Frente Popular Galega considerou apropiado neste 2010 apoiar a manifestación autodeterminista convocada por Causa Galiza que partía, nunha Compostela humillada pola presenza dos Borbóns e sitiada pola policía española, arredor das 13.30 horas da Alameda. Ao remate da mesma celebramos, como xa é tradición, o noso xantar de confraternidade no monte Pedroso. Foi aquí onde tivo lugar o acto político propio da FPG no que interviron amigos e representantes do Partido e tamén algúns representantes das delegacións internacionais que nos acompañaban.