a construción da república galega

V Asemblea Nacional da Frente Popular Galega

Vigo, 21 de maio de 2006

I. O MUNDO. O INICIO DO SÉCULO XXI

A. Un mundo unipolar

1. O século XXI empeza xa no último cuarto do século XX. A implosión do socialismo real marca o tránsito a un mundo que deriva ao desequilibrio. A hexemonía absoluta do Capital e do Imperio norteamericano, coas súas consecuencias tráxicas para as vidas das persoas, non quere contestación. O abismo entre ricos e pobres, entre as clases sociais, entre nacións, faise aparentar insuperable.

2. A desaparición do socialismo real, os novos modelos de produción e o proxecto de fragmentación do movemento obreiro favorecen esa hexemonía global. O Capital descoñece fronteiras e aspira, vaidoso cunha vitoria que considera definitiva, a clausurar a historia, a facer imposible a existencia á marxe do seu dominio.